ગુજરાતમાં મેઘતાંડવ, 189 તાલુકામાં વરસાદ, આગામી કેટલાક કલાક આ જિલ્લાઓ માટે ભારે

ગાંધીનગર : ગુજરાતમાં ચોમાસું પુરેપુરી ગતિએ આગળ વધી રહ્યું છે. સ્ટેટ ઇમરજન્સી ઓપરેશન સેન્ટર (SEOC) ના સવારે ૬:૦૦ થી ૮:૦૦ વાગ્યા સુધીના ડેટા અનુસાર, રાજ્યના કુલ ૧૮૯ તાલુકાઓમાં વરસાદ નોંધાયો છે. હવામાન વિભાગે આગામી કેટલાક કલાકો માટે તાકીદની નોવાકાસ્ટ (Immediate Forecast) જાહેર કરીને અડધાથી વધુ ગુજરાતને એલર્ટ પર મૂક્યું છે.

સૌથી વધુ વરસાદ ધરાવતા ટોપ-૧૦ તાલુકા

આજે સવારે ૨ કલાકમાં સૌથી વધુ વરસાદ નોંધાયો હોય તેવા મુખ્ય ૧૦ તાલુકાઓની યાદી નીચે મુજબ છે.

ચાર ઝોન પ્રમાણે વરસાદની સ્થિતિ

રાજ્યના ચારેય ઝોનમાં સાર્વત્રિક વરસાદ નોંધાયો છે.

• ૧. મધ્ય ગુજરાત : સમગ્ર રાજ્યમાં આ ઝોનમાં સૌથી તોફાની વરસાદ રહ્યો છે. અહીં ખેડાના મેહમદાવાદમાં સૌથી વધુ ૧૧૨ મીમી (૪.૪૧ ઇંચ) વરસાદ ખાબક્યો છે. આ સિવાય અમદાવાદના ધોળકામાં ૩૮ મીમી વરસાદ નોંધાયો છે.

• ૨. ઉત્તર ગુજરાત: આ ઝોનમાં પણ ભારે વરસાદ નોંધાયો છે. વાવ-થરાડ વિસ્તારના દિયોદરમાં સૌથી વધુ ૭૩ મીમી (૨.૮૭ ઇંચ) અને ભાભરમાં ૬૩ મીમી વરસાદ થયો છે. પાટણના રાધનપુરમાં ૪૮ મીમી વરસાદ નોંધાયો છે.

  ૩. સૌરાષ્ટ્ર : સૌરાષ્ટ્ર ઝોનમાં સવારથી જ ધીમી ધારે અને ભારે વરસાદની ઇનિંગ શરૂ થઈ છે. અહીં રાજકોટના જામકંડોરણામાં સૌથી વધુ ૫૫ મીમી (૨.૧૭ ઇંચ) વરસાદ પડ્યો છે, જ્યારે અમરેલીના બગસરામાં ૪૪ મીમી વરસાદ નોંધાયો છે.

  ૪. દક્ષિણ ગુજરાત: દક્ષિણ ગુજરાતમાં વરસાદનું જોર અન્ય ઝોન કરતાં થોડું ધીમું રહ્યું છે. અહીં તાપીના વાલોડમાં સૌથી વધુ ૩૬ મીમી (૧.૪২ ઇંચ) અને નવસારીના ખેરગામમાં ૨૮ મીમી વરસાદ નોંધાયો છે.

હવામાન વિભાગની ચેતવણી: કયા જિલ્લામાં કયું એલર્ટ?

તાજા નકશા અને નોવાકાસ્ટ (આગામી કેટલાક કલાકોની આગાહી) મુજબ જિલ્લાઓને બે ભાગમાં વહેંચવામાં આવ્યા છે.

• રેડ એલર્ટ (અત્યંત ભારે વરસાદની ચેતવણી) : સમગ્ર કચ્છ, ઉત્તર ગુજરાત (બનાસકાંઠા, પાટણ, મહેસાણા, સાબરકાંઠા, અરવલ્લી) અને મધ્ય ગુજરાત (ગાંધીનગર, અમદાવાદ, ખેડા, આણંદ, મહીસાગર, પંચમહાલ) જિલ્લાઓમાં રેડ એલર્ટ જાહેર કરાયું છે. આગામી કલાકોમાં આ વિસ્તારોમાં પૂર જેવી સ્થિતિ સર્જાવાની સંભાવના છે.

• ઓરેન્જ એલર્ટ (ભારેથી અતિભારે વરસાદની આશંકા) :

  સમગ્ર સૌરાષ્ટ્ર (મોરબી, સુરેન્દ્રનગર, જામનગર, દેવભૂમિ દ્વારકા, પોરબીંદર, જૂનાગઢ, ગીર સોમનાથ, અમરેલી, ભાવનગર, બોટાદ) અને સમગ્ર દક્ષિણ ગુજરાત (ભરૂચ, નર્મદા, સુરત, તાપી, નવસારી, ડાંગ, વલસાડ) માં ઓરેન્જ એલર્ટ આપવામાં આવ્યું છે.

તંત્રની સૂચના: નોવાકાસ્ટની ચેતવણીને પગલે નીચાણવાળા વિસ્તારો અને નદી કિનારાના ગામોને સાવધ કરી દેવામાં આવ્યા છે. નાગરિકોને આગામી કેટલાક કલાકો સુધી બિનજરૂરી પ્રવાસ ટાળવા વિનંતી કરવામાં આવી છે.