શ્રેષ્ઠ પશુપાલક એવોર્ડ 2026 : ગુજરાતમાં પશુપાલનને પ્રોત્સાહન આપવા માટે રાજ્ય સરકાર દ્વારા “શ્રેષ્ઠ પશુપાલક એવોર્ડ” યોજના અમલમાં છે. જો તમે આધુનિક પદ્ધતિથી પશુપાલન કરો છો અને તમારા પશુઓની સંભાળ, આરોગ્ય તથા ઉત્પાદન ક્ષેત્રે નોંધપાત્ર કામગીરી કરી છે તો તમને સરકાર તરફથી 1 લાખ સુધીનું રોકડ ઈનામ મેળવવાની તક મળી શકે છે.

રાજ્યના પ્રગતિશીલ પશુપાલકોને સન્માનિત કરવા માટે પશુપાલન વિભાગ દ્વારા દર વર્ષે આ એવોર્ડ આપવામાં આવે છે. આ યોજના માત્ર ઇનામ પૂરતી જ નથી, પરંતુ અન્ય પશુપાલકો માટે પ્રેરણારૂપ બનવાનો પણ એક સારો અવસર છે.

Pashupalan award 2026 : શું છે શ્રેષ્ઠ પશુપાલક એવોર્ડ યોજના?

ગુજરાત સરકારના પશુપાલન વિભાગ દ્વારા રાજ્યમાં પશુપાલન ક્ષેત્રે ઉત્તમ કામગીરી કરનારા પશુપાલકોને પ્રોત્સાહિત કરવા માટે આ યોજના શરૂ કરવામાં આવી છે. પશુપોષણ, પશુ સંવર્ધન, પશુ આરોગ્ય, પશુ રહેઠાણ અને આધુનિક ટેકનોલોજીના ઉપયોગ દ્વારા સફળ પશુપાલન વ્યવસાય ઉભો કરનારા પશુપાલકોને આ એવોર્ડ આપવામાં આવે છે.

યોજનાનો મુખ્ય હેતુ પશુપાલન વ્યવસાયને વધુ આર્થિક અને નફાકારક બનાવવાનો છે તેમજ અન્ય પશુપાલકોને પણ નવી પદ્ધતિઓ અપનાવવા પ્રેરિત કરવાનો છે.

Animal husbandry award gujarat : કોને મળશે લાભ?

રાજ્યના વ્યક્તિગત પશુપાલકો આ એવોર્ડ માટે અરજી કરી શકે છે. પશુપાલન ક્ષેત્રમાં નોંધપાત્ર અને પ્રેરણાદાયક કામગીરી કરનાર અરજદારોને પસંદ કરવામાં આવે છે.

જો કે, અગાઉના ત્રણ વર્ષ દરમિયાન આ એવોર્ડ મેળવી ચૂકેલા પશુપાલકો ફરીથી અરજી કરી શકશે નહીં.

Dairy farming award gujarat : કેટલું મળશે ઈનામ?

રાજ્ય સરકાર દ્વારા કુલ 78 શ્રેષ્ઠ પશુપાલકોને વિવિધ સ્તરે રોકડ પુરસ્કાર આપવામાં આવે છે.

રાજ્ય કક્ષા પુરસ્કાર

• પ્રથમ ક્રમ : 1,00,000

• દ્વિતીય ક્રમ : 50,000

• તૃતીય ક્રમ : 31,000

જિલ્લા કક્ષા પુરસ્કાર

• પ્રથમ ક્રમ : 25,000

• દ્વિતીય ક્રમ : 20,000

તાલુકા કક્ષા પુરસ્કાર

• પ્રથમ ક્રમ : 20,000

• દ્વિતીય ક્રમ : 10,000

Pashupalan award registration 2026 : અરજી કેવી રીતે કરવી?

શ્રેષ્ઠ પશુપાલક એવોર્ડ માટે અરજી કરવાની પ્રક્રિયા સંપૂર્ણપણે ઓનલાઈન છે. જ્યારે આઈ ખેડૂત પોર્ટલ પર અરજી મંગાવવામાં આવે ત્યારે તમે નીચે આપેલા સ્ટેપ ફોલો કરીને અરજી કરી શકો છો.

1. iKhedut પોર્ટલ પર જાઓ.

2. પોતાના નામે લોગિન અથવા નોંધણી કરો.

3. શ્રેષ્ઠ પશુપાલક એવોર્ડ યોજના પસંદ કરો.

4. જરૂરી વિગતો ભરો.

5. પશુપાલન સંબંધિત ફોટા અને વિડિયો અપલોડ કરો.

6. જરૂરી દસ્તાવેજો જોડીને અરજી સબમિટ કરો.

અરજી મળ્યા બાદ વિવિધ સ્તરની સમિતિઓ દ્વારા સ્ક્રુટિની કરવામાં આવે છે. ત્યારબાદ પસંદગી સમિતિ દ્વારા શ્રેષ્ઠ પશુપાલકોની પસંદગી કરવામાં આવે છે.

પસંદગીમાં કયા મુદ્દાઓ ધ્યાને લેવાશે?

પશુપાલકની પસંદગી કરતી વખતે નીચેના મુદ્દાઓ ધ્યાનમાં લેવામાં આવે છે:

• પશુઓની સંખ્યા અને ગુણવત્તા

• પશુ આરોગ્ય અને રસીકરણ વ્યવસ્થા

• પશુપોષણની પદ્ધતિ

• આધુનિક ટેકનોલોજીનો ઉપયોગ

• દૂધ અથવા અન્ય ઉત્પાદન ક્ષમતા

• પશુપાલન ક્ષેત્રે નવીનતા અને પ્રેરણાદાયક કાર્ય

પશુપાલકો માટે મોટી તક

જો તમે ગાય, ભેંસ, બકરા અથવા અન્ય પશુઓનું વૈજ્ઞાનિક અને આધુનિક રીતે પાલન કરી રહ્યા છો, તો આ યોજના તમારા માટે ખૂબ ઉપયોગી સાબિત થઈ શકે છે. સરકાર માત્ર તમારા કાર્યની કદર જ નહીં કરે, પરંતુ 1 લાખ સુધીનું રોકડ ઇનામ આપીને તમને સન્માનિત પણ કરશે.