દેશના કરોડો ખેડૂતો માટે રાહતના સમાચાર સામે આવ્યા છે, જેમાં વડાપ્રધાન કિસાન સન્માન નિધિ યોજનાના 22મા હપ્તાની તારીખ જાહેર કરવામાં આવી છે.

કેન્દ્ર સરકાર દ્વારા સત્તાવાર રીતે જણાવવામાં આવ્યું છે કે આગામી 13 માર્ચ, 2026ના રોજ પાત્ર ખેડૂતોના બેંક ખાતામાં હપ્તાની રકમ જમા થશે.

આ વખતે દેશના આશરે 9.32 કરોડથી વધુ ખેડૂતોના ખાતામાં ડાયરેક્ટ બેનિફિટ ટ્રાન્સફર (DBT) માધ્યમથી કુલ 18,640 કરોડ રૂપિયા મોકલવામાં આવશે.

વડાપ્રધાન નરેન્દ્ર મોદી આસામના ગુવાહાટી ખાતેથી એક ખાસ કાર્યક્રમ દરમિયાન રિમોટનું બટન દબાવીને ખેડૂતોના ખાતામાં 2,000 રૂપિયાનો હપ્તો ટ્રાન્સફર કરશે.

નોંધનીય છે કે PM કિસાન યોજના હેઠળ ખેડૂતોને વાર્ષિક 6,000 રૂપિયાની આર્થિક સહાય મળે છે, જે વર્ષમાં ત્રણ સમાન હપ્તામાં આપવામાં આવે છે.

અત્યાર સુધીમાં કુલ 21 હપ્તાઓ ખેડૂતોને મળી ચૂક્યા છે અને 13 માર્ચે મળનારો આ 22મો હપ્તો ખેતીકામમાં આર્થિક રીતે ખૂબ મદદરૂપ થશે.

સરકારે વર્ષ 2019માં આ યોજનાની શરૂઆત કરી હતી, જેનો મુખ્ય ઉદ્દેશ્ય નાના અને સીમાંત ખેડૂતોને બિયારણ તેમજ ખાતર માટે સહાય કરવાનો છે.